राजविराज, कमला खोलामा अवैध उत्खननका लागि सिफारिस दिएर सहयोग गरेको आरोपमा सिरहाको कर्जन्हा नगरपालिका-१ का वडाध्यक्ष फणिन्द्रप्रसाद पोखरेललाई डिभिजन वन कार्याल्य सिरहाले नियन्त्रणमा लिएको छ ।

कर्जान्हा नगरपालिका-१ बल्टियास्थित चुरे वन क्षेत्र भित्रको कमला खोलाको बगरबाट गत पुस ७ गते एस्काभेटर प्रयोग गरी अवैध रुपमा ढुंगा, गिटी र बालुवा उत्खनन गरिएको थियो ।
सोही दिन वन कार्यालयले एउटा एस्काभेटर र दुईजनालाई नियन्त्रणमा लिएको थियो । सोही प्रकरणमा वडाध्यक्ष पोखरेललाई नियन्त्रणमा लिइएको डिभिजन वन कार्यालय सिरहाका सूचना अधिकारी राधेश्याम चौधरीले जानकारी दिए
।
ऐन कानुनविपरीत अवैध उत्खननका लागि सिफारिस दिइ सहयोग गरेकाले वडाध्यक्ष पोखरेललाई नियन्त्रणमा लिइ थप अनुसन्धानका लागि डिभिजन वन कार्यालय सिरहा लहानको हिरासतमा राखिएको सूचना अधिकारी चौधरीले जानकारी दिए ।
वडाध्यक्ष पोखरेललाई डिभिजन वन कार्यालय सिरहाले पक्राउ पुर्जी दिएर पक्राउ गरेको हो । वडाध्यक्ष पोखरेल एमालेबाट निर्वाचित हुन् ।