करण तामाङ ।

रसुवा : राष्ट्रिय स्वतन्त्र पार्टी (रास्वपा) ले रसुवा जिल्लामा १७ सदस्यीय जिल्ला कार्यसमिति गठन गरेको छ । सभापतिमा रसुवाको नेता तथा समाजसेवी मान बहादुर तामाङ सर्वसम्मत चयन भएका छन् । जेष्ठ १० गते सम्पन्न पहिलो जिल्ला भेलाबाट विभिन्न भूगोल, लिंग र समावेशी आधारलाई प्रतिनिधित्व हुने गरी कार्यसमिति चयन गरिएको हो।
भेलाले उपसभापतिमा सेन देवी तामाङ, सचिवमा पासाङ तामाङ, सह-सचिवमा ओमप्रसाद पौडेल र सदस्यमा उर्केन् छोमु तामाङ, किरण आचार्य, ङवाङ फिन्जो तामाङ, रविन्द्र कुमार पौडेल, टेक बहादुर तामाङ र भरत नगरकोटी रहेका छन्।
पार्टीले प्रारम्भिक रूपमा ११ जना सदस्य घोषणा गरेको छ भने बाँकी सदस्यहरूलाई भूगोल र समावेशीताको सन्तुलनका आधारमा मनोनयन गरिने जनाएको छ। यससँगै पार्टीले रसुवामा आफ्नो सांगठानिक उपस्थिति बलियो बनाउँदै अघि बढ्ने संकेत गरेको छ । भेलामा प्रतिनिधि सभा सदस्य एवम् पार्टीका केन्द्रीय सदस्य गणेश पराजुलीले सम्बाेधन गरेका थिए ।
रास्वपाले हालै देशभर सांगठानिक विस्तार तीव्र बनाउँदै लिएको सन्देश दिँदै स्थानीय तहसम्म जनप्रतिनिधिसँगको सम्पर्क सुदृढ गर्ने लक्ष्य लिएको छ। रसुवामा गठन गरिएको यस कार्यसमितिले पार्टी नीति र कार्यक्रम जनस्तरसम्म पुर्‍याउने जिम्मेवारी पाएको छ । जिल्लामा पुराना दलबाट पाएकाे निराशाबाट माथि उठ्न पनि रास्वपामा उत्साहजनक सहभागीता देखिएको थियोे ।