काठमाडौं । भिजिट भिसा अनियमितता प्रकरणमा पक्राउ परेका विमानस्थल अध्यागमन कार्यालयका तत्कालीन सहसचिव तीर्थराज भट्टराईको थुनछेक बहस विशेष अदालतमा सकिएको छ। बहसपछि अदालतले भट्टराईलाई २५ लाख रुपैयाँ धरौटीमा रिहा गर्दै बाहिरैबाट मुद्दा लड्न अनुमति दिएको हो।




अध्यक्ष सुदर्शनदेव भट्ट र सदस्य नारायणप्रसाद पौडेल रहेको इजलासले उनीमाथिको मुद्दा पुर्पक्षका लागि थुनामा राखिराख्न आवश्यक नदेखिएको भन्दै धरौटीमा रिहाइ आदेश जारी गरेको छ।

तर इजलासका सदस्य डिल्लीराज श्रेष्ठले भने भट्टराईलाई पुर्पक्षका लागि थुनामा राखिनुपर्ने भन्दै फरक मत प्रस्तुत गरेका छन्।भट्टराई भिजिट भिसा प्रक्रियामा अनियमितता र दुरुपयोग गरेको आरोपमा पक्राउ परेका थिए। अब उनी बाहिरबाट मुद्दा लड्नेछन्।