काठमाडौँ । राष्ट्रिय स्वतन्त्र पार्टी (रास्वपा) को तर्फबाट खस आर्य समानुपातिक समूहमा फर्पिङ–दक्षिणकाली निवासी तथा नेपाली सेनाका पेन्सन प्राप्त विष्णु थापाले उम्मेदवारी दर्ता गराएका हुन्।

थापा विगत लामो समय नेपाली सेनामा रहेर स्वदेश तथा विदेशका विभिन्न मिसनमा सहभागी हुँदै आएका अनुभवी व्यक्ति हुनुहुन्छ। सेनामा रहँदा विभिन्न देशमा काम गर्ने क्रममा उहाँले अन्तर्राष्ट्रिय राजनीतिक प्रणाली, शासन शैली र संसदीय अभ्यासको गहिरो अध्ययन गर्नुभएको छ।




निडर र हक्की स्वभावका रूपमा परिचित थापाले राष्ट्रिय स्वतन्त्र पार्टीको नीति, विचार र नेतृत्वलाई संसदिय मोर्चामा प्रभावकारी रूपमा स्थापित गर्ने प्रतिबद्धता व्यक्त गर्नुभएको छ। उहाँले पार्टीभित्रको आन्तरिक लोकतान्त्रिक विधि र प्रक्रियाको सम्मान गर्दै जनमैत्री नीति निर्माणमा सक्रिय भूमिका निर्वाह गर्ने बताउनुभएको छ।

उम्मेदवार थापाले सुशासन प्रवर्द्धन, भ्रष्टाचारविरुद्ध सशक्त आवाज उठाउने, पार्टी सदस्यहरूको विचार र भावनाको सच्चा प्रतिनिधित्व गर्ने तथा सुसंस्कृत र जनकेन्द्रित संसदीय अभ्यासलाई संस्थागत गर्ने लक्ष्य लिएको उल्लेख गर्नुभएको छ।

यसैक्रममा उहाँले राष्ट्रिय स्वतन्त्र पार्टीका सम्पूर्ण सदस्य, शुभचिन्तक, समर्थक तथा ‘घण्टी प्रेमी’ सदस्यहरुलाई आफूलाई मतदान गरी जनताको सेवा गर्ने अवसर दिन आग्रह गर्नुभएको छ।