काठमाडौं । देशभर अहिले पश्चिमी वायुको आंशिक प्रभाव देखिएको छ । मौसम पूर्वानुमान अनुसार आज अधिकांश भू–भागमा मौसम सामान्यदेखि आंशिक बदली रहनेछ भने पहाडी तथा हिमाली क्षेत्रमा चिसो अझै बढ्ने देखिएको छ ।




उपत्यकासहित मध्य पहाडी क्षेत्रमा बिहान र बेलुका चिसो महसुस हुने अवस्था छ । तराईका केही स्थानमा भने बिहान हल्का कुहिरो लाग्ने सम्भावना रहेको छ । दिनको समयमा आकाश आंशिक बदली रहने र घाम लाग्ने सम्भावना रहेको मौसमविद्हरूले बताएका छन् ।
उच्च पहाडी तथा हिमाली भू–भागमा हल्का हिमपातको सम्भावना रहँदा त्यसले दैनिक जनजीवन र यातायातमा आंशिक असर पार्न सक्ने अनुमान गरिएको छ । विशेषगरी पहाडी सडकमार्ग प्रयोग गर्ने यात्रुलाई सतर्क रहन अनुरोध गरिएको छ ।
मौसम परिवर्तनशील रहने भएकाले किसान, यात्रु तथा सर्वसाधारणलाई आवश्यक सावधानी अपनाउन मौसम पूर्वानुमान महाशाखाले सुझाव दिएको छ । आगामी दिनहरूमा पनि पश्चिमी वायुको प्रभाव कायमै रहने सम्भावना रहेको जनाइएको छ।