सुर्खेत, असार १२ — सुर्खेत प्रहरीले करिब ३ करोड रुपैयाँ बराबरका सुनका गरगहना तथा नगद रकमसहित एक जनालाई नियन्त्रणमा लिएको छ।

जिल्ला प्रहरी कार्यालय सुर्खेतका अनुसार विशेष सूचनाका आधारमा गरिएको निगरानी तथा खानतलासीका क्रममा ठूलो परिमाणमा सुनका गरगहना र नगद बरामद गरिएको हो। बरामद गरिएका सुनका विभिन्न गरगहना तथा नगदको कुल मूल्य करिब ३ करोड रुपैयाँ बराबर रहेको प्रहरीले जनाएको छ।

प्रहरीले उक्त सामानसहित एक जनालाई नियन्त्रणमा लिएर थप अनुसन्धान अघि बढाएको छ। प्रारम्भिक अनुसन्धानमा बरामद गरिएका सुन तथा नगदको स्रोतबारे खुल्न बाँकी रहेको र त्यस सम्बन्धमा आवश्यक कानुनी प्रक्रिया अगाडि बढाइएको प्रहरीले जनाएको छ।