काठमाडौं। सामाजिक सञ्जालमा प्रधानमन्त्रीविरुद्ध गालीगलौजपूर्ण अभिव्यक्ति दिएको आरोपमा एक युवकलाई प्रहरीले नियन्त्रणमा लिएको विषयमा गृह मन्त्रालय ले गम्भीर ध्यानाकर्षण भएको जनाएको छ। मन्त्रालयले प्रेस विज्ञप्ति जारी गर्दै उक्त घटनाबारे औपचारिक प्रतिक्रिया दिएको हो।

विज्ञप्तिअनुसार, प्यूठानका एक युवालाई २०८२ चैत २६ गते प्रहरीले नियन्त्रणमा लिएको र साइबर अपराधसम्बन्धी कानुनी प्रक्रिया अनुसार अनुसन्धान अघि बढाइएको उल्लेख छ। जिल्ला अदालतबाट अनुमति लिएर अनुसन्धान गरिएपछि उनलाई चैत २९ गते परिवारको जिम्मा लगाइएको पनि मन्त्रालयले स्पष्ट पारेको छ।

सरकारले संविधानले सुनिश्चित गरेको अभिव्यक्ति स्वतन्त्रता र प्रेस स्वतन्त्रताको पूर्ण सम्मान गर्ने उल्लेख गर्दै आफ्नो विचार व्यक्त गर्दा सत्य, मर्यादित र जिम्मेवार हुनुपर्नेमा जोड दिएको छ। साथै, सामाजिक सञ्जालमार्फत असभ्य, अशिष्ट तथा अपमानजनक भाषा प्रयोग गर्ने कार्य प्रचलित कानुनविपरीत हुने चेतावनी दिइएको छ।

यस्ता गतिविधिहरूले सामाजिक सद्भाव र सार्वजनिक शान्तिमा असर पार्न सक्ने भन्दै मन्त्रालयले सम्बन्धित निकायमार्फत निरन्तर निगरानी भइरहेको जनाएको छ। नागरिकका मौलिक हक र अधिकारको रक्षा गर्न सरकार सधैं प्रतिबद्ध रहेको पनि विज्ञप्तिमा उल्लेख गरिएको छ।